Sniglarnir, vélhjólasamtök Lýðveldisins, hafa löngum staðið þétt við bakið á Hollvinum Grensáss.  Nýlega afhentu þeir enn eina veglega gjöf, sem var ágóði af jólaballi samtakanna, en allir sem að þeirri skemmtun komu gáfu vinnu sína, allt efni og aðstöðu. Ágóðinn nam meira en hálfri milljón króna og var skipt bróðurlega milli Hollvina Grensáss og Styrktarfélagsins Ás. Veittu fulltrúar þeirra gjöfinni móttöku í félagsheimili Sniglanna, þar sem meðfylgjandi mynd af gefendum og þiggjendum var tekin.  Hollvinir Grensáss senda Sniglunum innilegar þakkir fyrir veglega gjöf og ómetanlegan stuðning. Það stendur enginn einn sem á Sniglana að!

Þann 19. nóvember n.k. halda Hollvinir Grensásdeildar (HG) jólabasar frá kl. 13:00 til 18:00 í safnaðarheimili Grensáskirkju til styrktar starfsemi Grensásdeildar. Þar verður margt glæsilegra muna til sölu, er henta sérlega vel til jóla- sem tækifærisgjafa.  Einnig verður selt kaffi,  súkkulaði og vöflur með þeyttum rjóma.

Vonast er til að þau, sem þetta lesa, komi á basarinn og segi sem flestum vinum og ættingjum frá honum og hvetji þau til að koma.  Ávinningurinn er tvöfaldur því jafnframt því að fá fallegan mun eða veitingar á góðu verði er verið að styrkja hið frábæra starf Grensásdeildar.
 

Því er fagnað að nú skuli loks eiga að finna margdreifðum rekstrareiningum Landspítala háskólasjúkrahúss einn samanstað.  Hins vegar er lausnin sem virðist hafa orðið fyrir valinu mikið áhyggjuefni bæði hvað varðar byggingar- og rekstrarkostnað,  og eins að hún er langt því frá eins notendavæn og hún mætti og ætti að vera.  Tekið er á nokkrum meginatriðum í þessu sambandi hér fyrir neðan.  Önnur, sem skipta máli en ekki rædd eru t.d. kostnaður við aðkomukerfi,  við húsnæði fyrir vísindastarfsemi, sem stór spurning er um hvort allt þurfi að staðsetja við spítalann, o.fl..