Hollvinir Grensás safna fé bæði til tækjakaupa og almennra styrkja við starf Grensásdeildar og einnig til endurbóta á húsnæði deildarinnar. Hægt er að velja um mismunandi leiðir með því að smella á tenglana hér að neðan

                                                           Um samtökin
 
 
 
 
 
 
 
 
 
 
 
 
 
 

 

FRÁ FORMANNI HOLLVINA GRENSÁSDEILDAR

 
Ottó Schopka,formaður
 
Samtökin voru stofnuð í apríl 2006 í þeim tilgangi að styrkja endurhæfingarstarf Grensásdeildar Landspítala Háskólasjúkrahúss.
 
HVAÐ GERIR GRENSÁSDEILD SÉRSTAKA?
Hún er miðstöð frumendurhæfingar á Íslandi, einkum fyrir fólk með mænuskaða, heilaskaða og fjöláverka. Aðeins þar er veitt sérhæfð teymisþjónusta, bæði á legu- og göngudeildargrunni. Með hverjum skjólstæðingi vinnur samhæft teymi lækna, sjúkra- og iðjuþjálfa, hjúkrunar-, talmeina- og sálfræðinga, sem saman sníða meðferðina að breytilegum þörfum hvers og eins.
 
ÞJÓÐFÉLAGSLEG ARÐBÆRNI
Fleiri en tveir af hverjum þremur sjúklingum deildarinnar eru á vinnufærum aldri og um 20% þeirra sem útskrifast snúa til starfa á ný, en á sjö árum hafa skattar þeirra endurgreitt heildarkostnað Grensásdeildar það árið, sem þeir voru þar. Þá er ótalinn sparnaður vegna örorkubóta eða lífeyris, sem ella hefði þurft að greiða. Því betri sem aðstæður til endurhæfingar verða, þeim mun fleiri sjúklingar munu komast til starfa á ný. Síðast en ekki síst verður lífsgleðin sem fylgir því að ná meiri færni aldrei metin til fjár.
 
VANDINN ER BRÝNN
Mikilvægt er að endurhæfing hefjist sem fyrst eftir áfall. Töf á því skerðir möguleikana á að ná fullri færni og getur leitt til varanlegs skaða. Síðan Grensásdeild tók til starfa árið 1973 hefur einungis þjálfunarlaug verið bætt við. Þjóðinni hefur fjölgað um meira en 40% á þeim tíma. Hlutfallslega fleiri þurfa á endurhæfingu að halda vegna stórstígra framfara í læknisfræði og þess að nú bjargast fleiri úr slysum en áður. Um fjórðungur innlagna á Grensásdeild er vegna slysa og í slysum lendir fólk á öllum aldri.
 
VERKEFNIN FRAMUNDAN
Hollvinir Grensásdeildar hafa vakið athygli á starfi deildarinnar í fjölmiðlum og talað máli hennar við ráðamenn. HG hafa jafnframt styrkt deildina með kaupum á tækjum. Straumhvörf urðu á síðasta ári þegar Edda Heiðrún Backman leikkona stóð með stuðningi HG fyrir söfnunarátakinu Á rás fyrir Grensás. Þjóðin brást stórkostlega við þessu kalli og skilaði átakið yfir 100 milljónum króna. Það er mikilvæg hvatning til ráðamanna að sjá vilja þjóðarinnar svona í verki.
Þetta fé verður nýtt til brýnna úrbóta á Grensásdeild sem á bæði við húsnæðisvanda og tækjaskort að stríða, sem hamlar eðlilegri þróun í starfi hennar. Margt þarf að gera og er verið að skipuleggja framkvæmdir með ráðamönnum Grensásdeildar, heilbrigðisyfirvöldum og mögulegum fjármögnunaraðilum. Markmiðið er að Grensásdeild geti sinnt þeim vaxandi fjölda sem er háður þjónustu hennar. HG munu áfram gera það sem í þeirra valdi stendur til að þessu markmiði verði náð.
 
Það væri okkur hvatning og gleðiefni ef þú sæir þér fært að leggja okkur lið. Það getur þú gert m.a. með því að gerast félagi í HG (sjá stikuna á forsíðu) eða styðja við starf okkar á annan máta. Vonumst til að sjá þig eða heyra frá þér. Það er jafnframt einlæg von mín að hvorki þú né ástvinir þínir þurfi nokkurn tímann á Grensásdeild að halda, en ef svo færi er það þakkarefni að þessi deild með sínu frábæra starfsfólki skuli vera til.
 
Ottó Schopka, formaður Hollvina Grensásdeildar
 
 

 



 

 

 

 

 

 

Frá stjórn HG
 
Verið velkomin á heimasíðu Hollvina Grensásdeildar (HG) og þakka ykkur fyrir áhugann sem þið sýnið með því að líta inn. Hér má finna ýmsan fróðleik um starf og mikilvægi Grensásdeildar fyrir þjóðfélag okkar.
 
Fara í myndasafn